Gloria Aduana Cocson – Awardee 2008
Nagtaud manipud iti naulimek ngem naragsak nga familia iti Brgy.10, Barani Batac Ilocos Norte idi Abril 10, 1940. Maikatlo kadagiti uppat nga bunga da dati nga Policarpio ken +Consuelo Aduana. Nagturpos iti Elementaria iti Batac Central School, ket kasta met iti sekundaria ti Batac Rural High school. Ubing pay idi masursurona ti agaramid iti empanada babaen ti ipagna.
Gapu iti reggetna nga nagsursuro, nanayonan ti laingna ket naparnuayna ti naidumduma nga raman nga in-inut nga nakaay-ayo iti kaaduan.
Naiyasawa ken ni Malanio Coson iti tawenna a 15. Naaddaanda iti 7 nga annak, ket gapu iti adu nga anus ken gaget naitag-ayna ti familiana. Kadagiti fifiesta ken parambak dagiti il-ili, adda dita ni Nana Gloria nga aglutluto ti empanada ket ditoy nga naam-ammo ti GLORY’S empanada nga pagdidinamagan ti kaaduan pakairamanan dagiti sangsangili.ken gangannaet.
Iti daytoy nga ballaigi ni Nana Gloria, impakitana ti bunga ti pannakaipateg dagiiti kadawyan a ramit ken sursuro iti benneg ti panagluto idi punganay nga rebbengna laeng nga itultuloy ken taginayonen.
